大家有冇遇過以下情況…
女：「我已經乜都就晒你，點解你唔可以對我好啲」
男：「你唔好咁煩得唔得…」
女：「依家係你做錯事，我已經低聲下氣，你仲要鬧我？」
男：「成日講嚟講去嗰幾句，我都費事理你。」
女：「你可唔可以多啲陪小朋友，唔好成日出咗去玩得唔得？」
男：「就係因為你成日都搞到家嘈屋閉，我先唔鍾意留喺屋企…」

老實講…
有邊個想家嘈屋閉傷感情吖，但有時伴侶嘅態度真係好難忍…

根據資料顯示，有 80 % 感情出問題嘅伴侶，導致分手原因唔係因為唔愛對方，而係感情出問題後雙方嘅態度引致關係破裂…

由此可見…
扼殺愛情嘅致命傷係因為大家都用情緒嚟解決感情問題！
如果大家正同伴侶嘅關係出現裂痕，
好想破冰扭轉關係…
記住控制情緒好重要…

但有 3 個關鍵貼士，我一定要預先話你知…
由於好多人喺挽救關係期間，因為從來冇人教佢哋一啲「兩性關係心理學」嘅知識，以至白白錯失一段感情…

呢啲關鍵貼士係…「挽救關係過三關」
當你同伴侶出現問題時，你會用盡方法去挽救感情…前提係控制情緒，唔好大吵大鬧，要對伴侶付出 100 % 愛同關心， 

但挽救過程唔會一帆風順，中間你會遇到 3 個關卡…要小心！

第一關：無視
你哋感情出現問題，唔多唔少因為一齊嘅日子積累咗太多負面感覺畀對方（當然對方亦都一樣）但要挽救關係，就唔可以計較…

當你全心全意盡力修補而不停付出，不停對伴侶更好時…你會發覺對方喺開始嘅第一個階段，無論你講乜嘢…做乜嘢…無論你幾盡力，對方都好似冇任何反應，而且佢仲可能對你講出負面嘅說話，針鋒相對，單單打打，甚至口出惡言侮辱你…

但你要記住…
呢個係正常嘅必經過程，因為對方存留住你哋過往一齊時嘅負面感覺…
千祈唔好放棄，佢唔係唔愛你，只係未可以抽身睇到你而家嘅改變。

第二關：發洩
要去除自己喺伴侶心中過去嘅負面形象，必須要持續地進行證明你已經同以往唔一樣…
例如：唔再爭論、唔控訴…唔理對方態度係點…無論佢用乜說話攻擊你，都要當耳邊風，一定要掌控自己嘅情緒，令自己冷靜…
因為當佢睇到你冇咗以前嘅預期反應， 佢會感到詫異，你若持續落去，佢就會相信你已經改變！

第三關：轉化
喺修復關係嘅過程裏面，你要容許伴侶有足夠時間空間去觀察、感受、測試、消化、過濾、相信、接受！整個過程嘅時間每個人都唔同，要視乎你哋過去嘅負面經歷有幾深，快則一個月已經可以成功。

其實，當大家放低情緒，放低斤斤計較嘅態度，放低事事針鋒相對嘅姿態；當希望伴侶點對待自己時，自己對伴侶做先，慢慢令伴侶感受到關係上新嘅氛圍，大家嘅距離自然會慢慢拉近，重新為關係注入新嘅感情，你會發現，伴侶過往令你難以忍受嘅行為會轉化為愛嘅表現，感情自然好轉。


愛自己 🌹