很多女性朋友說：「我要嫁個有錢人！」其實有錢係咪代表幸福呢？

如果你真係嫁咗個有錢人，但佢本身冇時間陪你，又或者佢對你一啲都唔珍惜，呼之則來，揮之則去，咁你覺得你嘅人生，你將來嘅下半世同一個咁嘅人一齊是否幸福…..會否開心呢？其實你係嫁俾錢？或是嫁俾一個真正關心你，真係愛你、照顧你、同你可以行埋下半世，可以同你一生一世嘅人呢？

所以，今日好想同大家分享下女性應該要用啲乜嘢嘅條件去衡量最重要揀選你嘅下半世嘅伴侶係乜嘢呢？其實就係「品格」！

每一個男性佢同你一齊拍拖嘅時候，當你決定應唔應該嫁俾佢嘅時候，是很難決定！特別在啱啱拍拖時，你好難睇到佢真正嘅性格，係咪真係好？所以，我哋留意嘅就係佢嘅細節，唔係佢對你好唔好，而係睇吓佢如何對待側邊嘅人，佢如何同人相處，例如佢去食飯嘅時候，佢會唔會對侍應好冇禮貌，睇唔起人呢？又或者佢會唔會對屋企人好？當父母打電話俾佢嘅時候，同佢哋屋企人溝通講電話會唔會好冇禮貌？好唔孝順佢啲父母呢？又或者佢同D朋友一齊，佢係唔會好真誠咁對待啲朋友？聽佢講電話嘅時候，佢會唔會對佢哋呼之則來，揮之則去呢？

所以，我哋用一啲小事去留意你身邊同你拍拖嗰個男士，係咪你真正可以同佢長相廝守嘅人，如果佢對其他人、對屋企人好冇禮貌，睇唔起人！如果將來你同佢結咗婚，可能佢都會咁對你，所以我哋最緊要唔係因應嗰個男士有冇錢，而係佢個品格值唔值得你去愛！